Молитвослов Молитвослов
Версия для печати

Константин, Михаил и Феодор Муромские

Акафист св. благоверным князем, Константину и чадом его Михаилу и Феодору, Муромским чудотворцем

Кондак 1

Изрядный воеводо Небеснаго Царя, преславный просветителю страны Муромския, благоверный княже Константине, похвальная восписуем ти с чады твоими, Михаилом и Феодором: яю избавив древле люди муромския от прелести и скверны идольския, и привед их к свету веры Христовой, и ныне посещаеши их своею милостию и заступлением. Сего ради благодарственно вопием ти: радуйся, преблаженне княже Константине, скорый помощниче и заступниче наш.

Икос 1

Ангелу непорочному, страстотерпцу святому Глебу поревновав, пожелал еси неверный Муром в княжение себе прияти, да просветиши люди седящия во тьме и сени смертней светом боговедения. Сего ради вопием ти: радуйся, благочестиваго корене благоцветущая отрасле: радуйся, с высотою рода и богатство духовных дарований наследивый. Радуйся, тезоименитому тебе царю Константину поревновавый: радуйся, святому князю Владимиру подражавый. Радуйся, образ непорочнаго Глеба пред очами сердца живописавый: радуйся, начатое им дело совершити пожелавый. Радуйся, в юности благословением Феодосия осененный: радуйся, от младых ногтей благочестию наученный. Радуйся, поклонения идолам истребителю: радуйся, неверия и нечестия низложителю: Радуйся, Евангелия благовестниче: радуйся, егоже ради вера Господня в стране Муромстей возсия. Радуйся, преблаженне княже Константине, скорый помощниче и заступниче наш.

Кондак 2

Видя, вражды ради князей, чести и первенства ищущих, многая страны оставленныя без просвещения святою верою, не суетной славы желая, но трудов и подвигов благовестия веры Христовой взыскуя, возжелал еси Константине княжити в Муроме, да научиши люди неверныя воспевати Богу: Аллилуиа.

Икос 2

Разум словес апостольских сердцем уразумев, яко обративый грешника от пути заблуждения спасет душу, и покрыет множество грехов, потщался еси избрати себе жребий служения апостольскаго в стране Муромстей. Сего ради вопием ти: радуйся подвигов апостольских добрый ревнителю: радуйся, любве к ближним преисполненный. Радуйся, свеще, тьму неверия просвещающая: радуйся, солнце, тину нечестия изсушающее. Радуйся, неверныя люди к Богу приведый: радуйся, из недостойнаго честное изведший. Радуйся, благодати Божией посредниче: радуйся, начало новаго бытия стране Муромстей положивый. Радуйся, яко тобою наставляеми покланяемся Истинному Богу, радуйся, яко тобою познахом Отца Небеснаго. Радуйся, рачителю благий: радуйся, пастырю добрый. Радуйся, преблаженне княже Константине, скорый помощниче и заступниче наш.

Кондак 3

Силою свыше Апостолы иногда облекий во Иерусалиме седящия, на дело благовестия их уготовляя, чрез благословение святителя и всего освященнаго собора и молитвы верных, облече и тебе, грядуща на дело проповеди Евангельския, силою мужественною, да укрепляемый ею в подвизе служения, вопиеши Богу: Аллилуиа.

Икос 3

Имея велию веру и любовь к Пресвятей Богородице, в знамение Ея Покрова и заступления, приял еси чудную икону Ея, яко Благую Одигитрию, водительствующую тя в пути. Сего ради вопием ти: радуйся, благую часть избравый: радуйся, упование на Единаго Бога возложивый. Радуйся, себе молитвам церковным вручивый: радуйся, благословение свыше чрез них приявый. Радуйся, сильному Покрову Богоматере вверивыйся: радуйся, Честный Образ Ея в щит себе и ограждение стяжавый. Радуйся, не на воинство, но на помощь Божию надеявыйся: радуйся, веру Христову с надеждою мудро сочетавый. Радуйся, воине Царя Небеснаго: радуйся, о умножении Царствия Его пекийся. Радуйся, земныя радости презревый: радуйся, благ Небесных возжелавый. Радуйся, преблаженне княже Константине, скорый помощниче и заступниче наш.

Кондак 4

Бурею помышлений притрепетных смятеся отец твой, блаженне княже Константине, помышляя злонравие людей, к нимже княжити шел еси, но на благодать Божию уповая, благослови тя на подвиг, вопия Богу: Аллилуиа.

Икос 4

Слышав блаженне Константине, яко не хотяху невернии людие прияти тя, послал еси сына твоего, кроткаго агнца Михаила, увещавати непокорныя: они же убиша непорочнаго отрока. Мы же, прославляюще тя яко Авраама, в жертву Богу сына произволением приносящаго, вопием ти: радуйся, кроткий подражателю Христов: радуйся, добрый исполнителю Его заповедей любви. Радуйся, кротостию злобу побеждаяй: радуйся, врагом твоим добро творяй. Радуйся, Богу Отцу подражавый: радуйся, сына своего для спасения нечестивых не пощадевый. Радуйся, словом любве учение Бога, иже есть любы, насаждали: радуйся, свою душу за спасение ближних положити готовый. Радуйся, Бога и дело Божие паче близких возлюбивый: радуйся, яко плоть и кровь не яви ти, но Отец Небесный. Радуйся, образ кротости духовныя: радуйся, незлобия наставниче. Радуйся, преблаженне княже Константине, скорый помощниче и заступниче наш.

Кондак 5

Боготечная звезда явися стране Муромстей князь Михаил, возвещая имеющее возсияти солнце истинныя веры: мученическою бо кровию своею освяти неверную землю, нетлением просия телесе своего, благоуханием его наполни землю, и лики Ангел низведе с Небесе, поющих Богу: Аллилуиа.

Икос 5

Видя сына своего Михаила убиена и извержена из града, и злонравныя люди на брань с тобою уготовляющияся, возопил еси к Щедрому Богу, и услышал еси глас: дерзай Константине, и не бойся, яко во власть град получил еси. Темже мы взываем ти: радуйся, верою мужество укрепляяй: радуйся, молитву оружием содеваяй. Радуйся, яко Давид на Голиафа, на враги во Имя Господа вооруживыйся: радуйся, яко Константин на Максентия о силе Креста возмогаяй. Радуйся, не смерти злодеев, но спасения их возжелавый: радуйся, приведения их к Богу искавый. Радуйся, омраченных просвещение: радуйся, развращенных исправление. Радуйся, ожесточенных умягчение: радуйся, нечестия искоренителю. Радуйся, истинныя веры утвердителю: радуйся, благия надежды насадителю. Радуйся, преблаженне княже Константине, скорый помощниче и заступниче наш.

Кондак 6

Проповедник богоносный явился еси, блаженне, граду Мурому, храмы святыя устрояя, служение христианское совершая, веру возвещая, уча и наставляя старыя и юныя, да навыкнут вси воспевати Богу: Аллилуиа.

Икос 6

Возсия граду Мурому просвещение истины, и отгнася лесть бесовская труды, подвиги и молитвами твоими, блаженне Константине: прежде бо непокорнии людие, сами крещения просиша, и идолов сокрушиша. Мы же спасение получивше, вопием ти: радуйся, неверных исправление: радуйся, бесов посрамление. Радуйся, прелести державу поправый: радуйся, идольскую лесть обличивый. Радуйся, Православия проповедниче: радуйся, благочестия насадителю. Радуйся, храмов Божиих зиждителю: радуйся, благолепия Дому Господня рачителю. Радуйся, священных прав Церкви Божией блюстителю, радуйся, святыни ея верный хранителю. Радуйся, неизнемогаяй учителю веры: радуйся, присный наставниче. Радуйся, преблаженне княже Константине, скорый помощниче и заступниче наш.

Кондак 7

Хотя привести вся люди ко Христу, молился еси Богу, да открыет сердца их к принятию света истины: люди же убеждал еси прияти веру святую, яко залог счастия временнаго и вечнаго. Темже молися и о нас, преблаженне, да вопием вси чистою душею Богу: Аллилуиа.

Икос 7

Дивное показа знамение Господь, егда невернии с оружием и дреколием устремишася на тя, ты же с молитвою пад пред иконою Богоматере, ходатайства у Сына Ея прося, абие услышал еси глас: дерзай Константине, Аз есмь с тобою. Мы же, прославляюще таковое о тебе Божие благоволение, радостно зовем: радуйся, на земли слышати глас Самаго Бога сподобивыйся: радуйся, и дерзай, яко Господь с тобою, Иже от несущих вся приведый. Радуйся, яко с тобою Господь, изведый древле Израиля из работы египетския: радуйся, яко с тобою Господь, амаликову силу в пустыни победивый. Радуйся, яко с тобою Господь, снисхождением Своим Небеса преклонивый: радуйся, яко с тобою Господь, Духом Силы Своея весь мир просветивый. Радуйся, яко с тобою Господь, сильный во бранех: радуйся, яко с тобою Господь, всяку гордыню побеждаяй. Радуйся, яко с тобою Господь, силу Свою в немощи совершаяй: радуйся, яко тебе Господь прибежище и сила. Радуйся, яко с тобою Господь, благоволивый просветити страну Муромскую: радуйся, яко с тобою Господь, новыя люди в Свое Царство призвати изволивый. Радуйся, преблаженне княже Константине, скорый помощниче и заступниче наш.

Кондак 8

Странное чудо является: воины с оружием и дреколием пред безоружным князем, яко щит видяще точию в руках икону Богоматере, ниц повергаются: видевше бо икону сияющу аки солнце, лице князя яко лице Ангела, с трепетом просяще крещения, возопиша Богу: Аллилуиа.

Икос 8

Весь был еси в вышних, блаженне княже Константине, духом веселяся со ангелы радующимися о едином грешнице кающемся, егда банею пакибытия обновляхуся людие муромстии, и свет Небесный осия новокрещенныя люди. Мы же, радующеся смотрению Божию о тебе и людех, ублажаем тя, зовуще: радуйся, град сей от работы диаволу свободивый: радуйся, власть мысленнаго фараона сокрушивый. Радуйся, к земле обетованней спасения приведый: радуйся, манною жизни люди твоя напитавый. Радуйся, громом Славы Божией неверие поразивый: радуйся, молниею света благодати облиставый мрак заблуждения. Радуйся, упование на Богоматерь возложивый: радуйся, Ея заступлению и покрову вверивыйся. Радуйся, ведети Матерь Спасения научивый: радуйся, милостей Ея проповедниче. Радуйся, и град свой Ея ходатайству вручивый: радуйся, Божия благоволения ходатаю. Радуйся, преблаженне княже Константине, скорый помощниче и заступниче наш.

Кондак 9

Всякое место страны твоея освятити хотяй, повелел еси ставити церкви во граде и селех, и монастыри мужеския и женския, да всюду воспевают Богу: Аллилуиа.

Икос 9

Ветии многовещанныя не возумеют прославити труды твоя, скорби и подвиги, яже подъял еси ради новокрещенных людей, врагов отражая, вражду умиряя, страну просвещая и устрояя, сирых призирая, неведущих вразумляя. Темже прославляюще тя, взываем: радуйся, сирых защитниче: радуйся, вдов заступление. Радуйся, нищих питателю: радуйся, скорбных утешителю. Радуйся, неведущих вразумление: радуйся, младенцев воспитание. Радуйся, страны Муромския ограждение: радуйся, града укрепление. Радуйся, враждующих примирителю: радуйся, терпеливый в обидах. Радуйся, Славы Божией точию искавый: радуйся, вся земная в суету вменивый. Радуйся, преблаженне княже Константине, скорый помощниче и заступниче наш.

Кондак 10

Спасти хотяй душу твою, до смерти подвизался еси подвигом добрым, течение скончал еси, веру соблюл еси: темже и уготован ти венец правды от Христа Бога нашего, яко возлюбльшему Его паче всего. Егоже и приял еси преселивыйся от сея временныя жизни к жизни вечней, и тамо вопиеши Богу: Аллилуиа.

Икос 10

Стена еси и покров всем к заступлению твоему прибегающим преблаженне Константине, дар чудодейственныя благодати от Бога приемый. Темже буди и нам стена крепкая, и прибежище и заступление, в нуждах наших к тебе прибегающим, и вопиющим: радуйся, земное поприще жизни твоея ангельски совершивый: радуйся, величие сана княжескаго на земли и послушание вернаго раба Царю Небесному мудро совместивый. Радуйся, святых детищ твоих, Михаила и Феодора, измлада Богу сочетавый: радуйся, сердце свое и их в руце Божии положивый. Радуйся, винограда Христова делателю добрый: радуйся, князем похвало и царем славо. Радуйся, яко земная храмина тела твоего покровом нетления одеяся: радуйся, яко святыя мощи твоя источают чудеса. Радуйся, добрый и верный рабе Христов: радуйся, достойную мзду по делом твоим приявый. Радуйся, ходатаю наш пред Богом: радуйся, присный молитвенниче о нас к Богу. Радуйся, преблаженне княже Константине, скорый помощниче и заступниче наш.

Кондак 11

Пение всеумиленное приносим ти, преблаженне Константине, просяще твоея помощи и ходатайства о нас к Богу: исцели наша немощи, якоже исцелил еси старицу Феодосию, четыре лета нему и глуху бывшу. Воздвигни нас от одра болезней, яко воздвигл еси боярскаго сына Иоанна, многая лета болезнию одержима бывша, да спасаемии тобою вопием Богу: Аллилуиа.

Икос 11

Светоприемную свещу, во граде сем благодатию Божиею возжженную: зрим раку святых мощей твоих, светит бо всем во мраце уныния сущим, озаряет скорбныя, путеводит заблуждшия, путь ко спасению и врачеванию всех немощей указующи. Темже прославляюще Бога, даровавшаго тебе благодать таковую, взываем ти: радуйся, скорбей сердца нашего благодатное успокоение: радуйся, горестей в жизни нашей услаждение. Радуйся, кичений ума нашего умирение: радуйся, сомнений недоуменных разрешение. Радуйся, страстей и желаний суетных обуздателю: радуйся, чистых намерений и благих начинаний руководителю. Радуйся, совести нашея страже недремляй: радуйся, ума нашего светильниче светлый. Радуйся, воли нашея, яже ко благому, спутниче верный: радуйся, верный руководителю в путех жизни нашея. Радуйся, жизнию своею образ благочестия нам оставивый: радуйся, верою своею правило веры нам показавши. Радуйся, преблаженне княже Константине, скорый помощниче и заступниче наш.

Кондак 12

Благодать данную тебе от Бога уведев, притече к раце твоей царь Иоанн, заступления и помощи прося от тебе к победе на агаряны: и победив врага, древле и с тобою враждовавшаго, благодарственно припадая к мощем твоим, вопияше к Богу: Аллилуиа.

Икос 12

Поюще велия твоя, преблаженне Константине, подвиги и труды в жизни сей, ублажаем приснопамятное успение твое, торжествуем и о Божественней славе твоей в Небеснем Царствии, и припадающе к раце мощей твоих, взываем: радуйся, Апостолов подражателю: радуйся, подвига мучеников ревнителю. Радуйся, патриархов добродетели показавый: радуйся князей украшение. Радуйся, Церкви похвало: радуйся, верных утешение. Радуйся, Российския страны украшение: радуйся, града Мурома ограждение. Радуйся, в скорби и радости наше прибежище: радуйся, упование наше в ненадеянных. Радуйся, путешествующих добрый хранителю: радуйся, напаствуемых защито. Радуйся, преблаженне княже Константине, скорый помощниче и заступниче наш.

Кондак 13

О преславнии чудотворцы, святии благовернии князи, Константине, Михаиле и Феодоре! Приимите ныне от нас малое сие хваление, и испросите нам своим благоприятным ходатайством у Христа Бога утверждение в вере и добрых делех, избавление от всех бед и напастей в жизни сей, а в смертнем успении нашем благую спасения надежду, да сподобимся в радости вечней воспевати с вами Богу: Аллилуиа.

(Этот кондак читается трижды, затем икос 1 и кондак 1)

  Новости Татарстанской митрополии

© Татарстанская митрополия РПЦ, 2001-2012.
Сайт управляется системой «Expresss-Web».
Создание и поддержка – проект «Епархия»

Сайт создан по благословению митрополита Казанского и Татарстанского Анастасия.
Цитирование и перепечатка приветствуются при гиперссылке на сайт www.prav-molitvoslov.ru